الأسنان اللبنية - الحلقة الثانية

بعض الأطفال بييجى للعيادة وأحد ضروسه الدائمة فيه تسوس شديد ولما بنسأل الأب أو الأم بيقول انه كان فاكره لبنى وهايغير لانه لسة صغير.

طبعا احنا متفقين من الحلقة اللى فاتت إنى لازم احافظ على الضروس اللبنية وماسيبهاش تسوس علشان مانضطرش نخلعها وندى فرصة لاعوجاج الضروس الدائمة - دا أولا

ثانيا : عايزين نعرف إن أول ضرس دائم بيطلع فى سن ال 6 سنوات وبالتالى الطفل اللى عنده 6 سنوات  هايبقى اخر ضرس فى فكه هو ضرس دائم .

ــــــــــــــــــــــــــــــــــــــــــــــــــــــــــــــــــــــــــــــ

نقطة أخرى بتخلينا نتكاسل عن حشو الضروس إعتقادنا إن الطفل ماخلعش ضروس لسة  وبالتالى لسة ماغيرش واللى فى بقه كله لبنى
طبعا دا غلط جدا 

فم الطفل بيحتوى على 20 سنة وضرس ( 5 فى كل جنب )يعنى لو قسمنا فك الطفل العلوى أو السفلى نصفين يمين وشمال هانقدر نعد فى أى نصف منهم سنتين وناب وضرسين
طب احنا الكبار عندنا 32 سنة وضرس (بضروس العقل ) يبقى فيه  12 ضرس فرق بيننا وبين الأطفال ,. وال 12 ضرس دول بيطلعوا فى المكان الفاضى فى اللثة وراء الضروس اللبنية مش تحتها
الخلاصة إن فيه ضروس زيادة بتطلع من غير لبنى فوقها
بمعنى مانستناش ضروس الطفل تغير علشان نحشيله
فترة 6 ل 12 سنة بيبقى فيها اختلاط بين اللبنى والدائم والطبيب هو اللى هايعرفه
ــــــــــــــــــــــــــــــــــــــــــــــــــــــــــــــــــــــــــــــ

خطأ اخر مهم جدا وهو ان بعض الناس بتشوف بداية ظهور سنة دائمة خلف السنة اللبنية ناحية اللسان وبتنتظر انها تطرد اللبنية وتخرج
نخلى بالنا كويس ان مجرد ظهور السنة الدائمة فى فم الطفل  يبقى ماينفعش اللبنية تفضل لان دا هايتسبب فى ان الدائمة هاتكمل على اعوجاجها وهاتطلع لجوه من غير ماتطرد اللبنية , فى الحالة دى ساعات بتكون اللبنية متلخلخة بشكل واضح ممكن نشيلها أو جامدة يبقى مانستناش عليها ونذهب للطبيب فورا (اليوم بيفرق)
ــــــــــــــــــــــــــــــــــــــــــــــــــــــــــــــــــــــــــــــ

آخر خطأ معنا وللأسف بيقع فيه ناس كتير ويترتب عليه كوارث وهو اعتقاد البعض بإن فترة التسنين من 6 -12 سنة وبالتالى مش مهم اللى يسوس( مايتخلع ويطلع غيره)
لأ لأ لأ لأ خالص
فترة م 6-12 سنة هى الفترة اللى بيتم فيها التسنين بمعنى إن أول ضرس بيطلع عند 6 سنين ولو اتخلع مش هايطلع , ضرس اآخر بيطلع عند 7 أو 8 , الضروس اللبنية بتتغير عند 9-10 سنين , الناب بيطلع عند 11 ل 12 سنة يعنى كل ضرس أو سنة لها موعد محدد بتطلع فيه لمرة واحدة فقط فى العمر
اللى طلع لو اتخلع مش هايطلع مش هايطلع خاااااااااااااالص
ــــــــــــــــــــــــــــــــــــــــــــــــــــــــــــــــــــــــــــــ

كفاية كدا علشان ماتزهقوش مننا

لمراجعة الحلقة الأولى