بإذن الله فى الموضوع دا والمواضيع الجاية هانتكلم عن التسوس والحشوات بأنواعها
هانبدأ مع بعض بمقدمة لابد منها
إيه هو التسوس ؟؟ بيحصل إزاى؟؟
زى ماعودناكم مش هانستخدم مصطلحات علمية أو معقدة
لما بناكل بيفضل بقايا أكل على الأسنان , وطبعا أكلنا بقى دايما بيحتوى على كربوهيدرات وحلويات ومعجنات والذى منه مع وجود نسبة قليلة جدا للأسف من الألياف اللى موجودة فى السلطة والخضروات اللى كنا بنحطها مع الأكل زمان زى الخس وخلافه ودى بتساعد فى تنظيف الأسنان وتقليل معدل التسوس
المهم البكتيريا بتتألق وتشتغل على بقايا الأكل اللى على أسنانك وتنتج حمض 😮😮 أيوة حمض , يعنى تخيل إنك بتحط مية نار على ضرسك ودا طبعا بيسبب تآكل فى الضرس ويبدأ عملية التسوس
ناس بتسألنى كتير
هو أنا لو غسلت أسنانى هاشيل البكتيريا من على أسنانى وهاوقف التسوس على كدا ؟؟
والإجابة للأسف لأ (ماكان من الأول دلوقتى افتكرت غسيل الأسنان!! )
البكتيريا اللى موجودة فى التسوس بتبقى على عمق من سطح الضرس والمعجون مش هايوصلها كلها مهما حاولت دا بالإضافة إن ليها وسائل حماية بتحمى بيها نفسها وتستمر فى حفر أسنانك (الغسيل هايبطئ التسوس ؟ أكيد ولكن مش هايوقفه)
النقطة التانية هى إن الضرس مش بيبنى الجزء المتآكل تانى مهما حصل ولا يوجد أى علاج يعيد بناء الضرس بشكل طبيعى
طبعا الحاجات اللى موجودة على النت والخلطات السحرية دى بتقع فى نطاق مابين الهبل والنصب
طب ضرسى مسوس بس مش بيوجعنى !!😇
ماتاخدش الوجع مقياس أبدا تحدد بيه زيارتك لطبيبك
الألم بيختلف من شخص لشخص ودا مالوش علاقة بقوة تحمل الشخص نفسه لأ دا له علاقة بحاجات فى الجسم
فيه ناس بتيجى العيادة بألم فى بدايات التسوس وفيه ناس بتيجى الضرس مكسور نصين
مجرد ماتلاحظ التسوس أو تشتكى مع الأكل والشرب بتروح لطبيبك (دا مالوش علاقة بالزيارت الدورية اللى المفروض تعملها أصلا)
أصل أنا باخاف من البنج والحشو والحاجات دى
طب إرجع كدا جملتين فوق هاتلاقينى قلت إن التسوس مش هايتوقف وهايستمر , واستمراره دا هايوصل للعصب اللى بيعمل ألم رهيب غير محتمل وساعات مابيستجيبش للمسكنات وساعتها هاتبقى مجبر إنك تروح لطبيبك بعد معاناة مع ألم شديد وتعمل إجراءات أكتر فى العيادة 😓 وتدفع فلوس أكتر 😉
زى ماقال أحد أساتذتنا : هات ضرسك وتعالى قبل ماهو اللى يجيبك وييجى
طب خلاص إنت قلقتنى هاروح للدكتور
بس أحشى عصب ولا عادى ولا بلاتين ولا حشو تجميل ولا إيه
لأ دا احنا كدا محتاجين قعدة ... خلينا نشرحها واحدة واحدة فى المرة الجاية
شاهد أيضا
تحياتى
د/ أحمد الطامى
تعليقات: 0
إرسال تعليق