ليه الأسنان الأيام دى بتسوس بسرعة

دايما الناس بتسأل ليه مش زى أهالينا اللى كانوا مابيستخدموش فرشة و معجون 

ولا بيهتموا بزيارات طبيب الأسنان وماكانوش بيشتكوا.

السبب هو إختلاف النظام الغذائى

يعنى زمان ما كانش فيه إستهلاك للمعجنات والحلويات والنشويات زى الأيام دى. 

لكن النقطة الأهم هى إنهم كانوا تقريبا مش بيأكلوا أى وجبة بدون خضروات 

الفطار ما كانش بسكوت وكوباية شاى 

لأ دا كان عيش ناشف وفطار وحاجة خضرة

الحاجة الخضرة دى ميزتها إن فيها ألياف بتشيل بقايا الأكل من الأسنان

كان الخس مثلا موجود فى البيت باستمرار 

لأ دا فيه حاجات كمان شبه إنقرضت 

أنا لو سألت على الجعضيض مثلا هالاقى ناس كتييير ما تعرفش هو إيه أساسا مع إن دا كان أشهر حاجة خضرة بتتحط جنب الفطار زمان، دلوقتى إحنا بنحط جنب الأكل شيبسى ونبلغ بمياه غازية

نقطة أخيرة وهى الصحة العامة 

مانقدرش ننكر إنهم كانوا زمان بيتمتعوا بصحة أفضل منا 

دا بينعكس على صحة الفم و إلتهابات اللثة 

وماننساش إن حالة المعدة بتنعكس بشكل واضح على صحة الفم