حشو العصب - مقدمة لابد منها

يعنى إيه عصب أصلا اللى احنا بنحشيه دا ؟

ودا لأنه مش عصب فقط . هو فعلا لب أو قلب السنة من جوه وبيحتوى على شعيرات دموية وانسجة وأعصاب.

بس هانمشيها عصب فى كلامنا الجاى  علشان ماحدش يتوه منى (بس نبقى عارفين إنه مش مجرد عصب)

طب هو لازمته إيه ؟ يعنى له فايدة ؟

أهم فايدة للعصب إنه بيغذى الضرس من جوة ويحافظ على نسبة رطوبة فيه ماتخليهوش هش أو قابل للكسر (بياخد ويدى يعنى )
ثانيا التسوس بيمشى أبطأ فى وجود عصب لأنه بيبنى الضرس من جوه علشان  يقاوم التسوس قدر الإمكان
وطبعا بيخلى الضرس يحس بالبارد والساخن علشان مانضرش نفسنا بحاجة باردة أو ساخنة زيادة عن اللزوم


نبدأ بقى الجد ؟

حضرتك تركت التسوس لحد ماخترق طبقة المينا ونزل على طبقة العاج تحتها خرمها هى كمان ووصل للمكان اللى فيه العصب
ساعتها ممكن يكون فيه ألم شديد وممكن لأ
يعنى ناخد بالنا كويس إن الألم الشديد مش مقياس لوصول التسوس للعصب ، لأن الناس بتستغرب وتقول الضرس ماوجعنيش يبقى عصب إزاى ؟
بص ياسيدى أى شكوى مزمنة مش بتبقى مؤلمة زى السكر والضغط مثلا مش بنحس بيهم إلا لما آثرهم الجانبية تظهر على الجسم
كذلك لو كانت إصابة العصب مزمنة (يعنى البكتيريا مادخلتش العصب لسة بس السموم والمواد الناتجة عنها بتتسرب لجوه العصب) بيبدأ العصب بتسمم ويموت وبالتالى سيادتك مش هاتحس بألم

بيحصل الألم إمتى فى الحالة دى 

لما العصب يتحلل ويتعفن ويكون صديد يضغط على باقايا العصب الحية أو حتى على العصب الرئيسى اللى الضرس واخد منه (العصب اللى ماشى فى عضم الفك) وعلى العضم اللى حوالين الضرس ويحصل بقى الألم الجبار اللى المسكنات مابتجيبش معاه

وهنا نقطة مهمة 

موضوع التأثير على العصب اللى ماشى فى الفك كله دا لو فى الفك السفلى ممكن تحس بالألم لحد الأسنان الأمامية ويسمع فى الأذن وساعات ناس بتتخيل إن المشكلة فى ودنها ويقعدوا يعالجوا فى ودنهم بدون نتيجة
ولو فى الفك العلوى ممكن يعمل صداع نصفى شديد وبرضه ناس بتكشف نظر وأنف وأذن وحتى مخ وأعصاب

خلينا نعمل لك مثل بالبلدى كدا : إنت عندك ماسورة مية اتكسرت ومغرقة المطبخ ، قوم إنت بقى توفيرا للفلوس والوقت والمجهود قمت رامى شوية أسمنت على الماسورة وفعلا المية وقفت ، بس تفتكر دا الحل؟؟؟؟
طبعا المية هاتتسرب للأرضيات والجدران وتدمر المطبخ واللى حواليه ودا لأنك كان المفروض تعالج الجزء المعطوب  مش تغطى عليه (قيسها إانت بقى على الضرس وانا عارف انك ذكى)