إتكلمنا فى الحلقة الأولى والثانية عن أهمية الحفاظ على الأسنان اللبنية وضرورة عدم خلعها قبل موعدها
طيب لو ضرس اتخلع بالفعل هل فيه حل ؟
الحل بيتمثل فى تركيبة معينة بتمنع إن مكان الخلع يضيق
التركيبة دى إسمها حافظ المكان (space maintainer) ودى تركيبة بسيطة جدا مش بتضايق الطفل ولا بتأثر على أكله ولا بتحتاج أى تحضيرات خاصة فى فم الطفل
مجرد مقاس لفم الطفل الدكتور بيعمله وبيجهز التركيبة بالتنسيق مع معمل الأسنان وبتتلزق فى مكانها بمادة معينة وخلص الموضوع
دا هاينقلنا لسؤال تانى
هو أنا امتى أعمل لإبنى تقويم لو حسيت إن فى بوادر لاعوجاج أو أى مشكلة ؟
ضرورى جدا نفهم إن تقويم الأسنان مش مجرد السلك اللى بيتركب يشد الأسنان ويعدل أماكنها
التقويم دا علم وعالم كبير وأول جزء منه بيسمى التقويم الوقائى
يعنى إيه تقويم وقائى ؟؟؟؟؟؟
يعنى مجموعة إجراءات بنتخذها علشان مانحتاجش نعمل التقويم الكامل دا أو ع الأقل نسهل عمله فى المستقبل, ودا بيبدأ من بداية التسنين عند الطفل, يعنى لو الطفل بدأ التسنين وبدأنا نلاحظ أى ملاحظة غريبة فى أسنانه نستشير الطبيب فورا
مش هانستنى لاكتمال التسنين زى مابعض الناس معتقدة .
الخلاصة : لو بدأنا بدرى ممكن نوجه الأسنان تطلع بالطريقة المناسبة ونعدل أماكنها وهى لسة طالعة كدا والعضم مابقاش جامد حواليها ومانحتاجش تقويم خالص
آخر حاجة وأعتقد انها هاتبقى نهاية السلة دى
شكوى بنسمعها من أمهات كتير
إبنى أسنانه طالعة كبيرة وعايزة أبردها علشان شكلها وحش
طبعا مافيش حاجة إسمها نبرد السنة أو نشيل منها طبقة علشان نصغرها لأن الطبقة الخارجية من السنة (اللى هى طبقة المينا) دى طبقة الحماية للسنة ودى القلعة الحصينة ضد التسوس , بمجرد مالطبقة دى بتتآكل التسوس بيجرى زى الحصان فى الطبقات اللى تحت
النقطة التانية إن دى أسنانه اللى هاتفضل معاه طول عمره . يعنى لسة هايكبر وحجم وشه يزيد والأسنان حجمها مابيزيدش وبالتالى كل ماعمره يزيد شكله هايظبط أكتر .
أعتقد إن دى تقريبا الأسئلة الأكثر تكرارا ودى هاتكون آخر حلقة فى السلسلة دى مؤقتا إالا إذا ربنا هدانى لأسئلة أخرى متعلقة بموضوع الأسنان اللبنية .
أو حد عنده أسئلة فالتعليقات مفتوحة تحت المقال
تعليقات: 0
إرسال تعليق