هانحشى بقى الضرس دا👆👆
طب ايه نوع الحشو؟طبعا طبيبك اللى بتثق فيه هو اللى بيختار نوع الحشو المناسب ليك ولكن هدفى إنى أوضحلك معلومات عن الحشوات دى نظرا لانتشار معلومات خاطئة كتير عنها
فى الحشوات العادية (مش حشو العصب يعنى ) فيه 3 أنواع مشهورين
حشو البلاتين
حشو الليزر
الحشو الزجاجى
الحشو الزجاجى مش هانتكلم عليه لانه بيندرج تحت بند الحشو التجميلى مع الليزر وفى السنين الأخيرة بدأ الليزر يتفوق عليه بشكل واضح , أنا شخصيا فى عيادتى ماعنديش حشو زجاجى من كذا سنة .
طبعا فيه أنواع وطرق تانية غير ال 3 دول ولكن احنا بنتكلم فى العادى , مش هاجيبلكم حاجة مكلفة زيادة عن اللزوم أو حاجات جديدة لدرجة انها مش موجودة عندنا , أنا باتكلم فى الحشوات اللى أكيد هاتلاقيها عند الدكتور بتاعك.
حشو البلاتين
Dental Amalgam
زى مانتوا عايزين تسموه : بلاتين و مملغم و أمالجم , الحشو الاسود زى مالبعض بيطلق عليه هو نفس الحاجةكالعادة مش هانتكلم كلام علمى معقد ولكن فعلا ناس كتير سألتنى عن الحاجات اللى هاكتبها دلوقتى
تكوينها
فضة وقصدير ونحاس وزنك دى المواد الأساسية فى البودرة بتاع الحشوة وبيضاف عليها الزئبق ويتخلطوا فتتحول لعجينة معدنية بتوضع فى مكان التسوس بعض تنضيفه وبتنشف بعد فترة لتتحول لقطعة معدنية واحدة.
طب ازاى المعدن بيمسك فى السنة؟
ببساطة زى ماحضرتك بتحط إزازة الماء فى الفريزر ولما تخرجها عمر التلج ماهايقع منهاالدكتور بيحضر المكان بعد ازالة التسوس بحيث يكون زى حفرة فتحتها ضيقة عن أرضيتها
مميزاته
- أهم وأكبر واعظيم ميزة وهى إن مافيش حشوة فى قوته وصلابته وتحمله (حديد ياجماعة💪💪💪)الميزة التانية وهى اللى شرحناها فى السطرين اللى فوق إنه مابيخرجش من الضرس
الميزتين دول بيخلوا الحشو المظبوط اللى من خامة كويسة يعيش 15 سنة فأكثر (دا طبعا مع المحافظة والاهتمام)
- ميزة مش مهمة أوى وهى إنه أرخص من الليزر ( مش أوى يعنى بس أهى ميزة )
عيوبه
- لونه طبعاكمان زى ماتفقنا هو حديد مش بيلزق على السنة وبالتالى ممكن يحصل تسريب مابينه وبين سطح الضرس يسبب التسوس من جديد على المدى البعيد (هو صحيح بيطلع مواد بتقفل التسربات دى ,ولو معمول صح ومن نوعية محترمة هاتقل فرصة التسريب بس أهو مازال عيب فيه)
- فيه عيب بيظهر من سوء اختيار الطبيب للحشوة,يعنى كبيرة مقارنة بحجم الضرس , يعنى التسوس مدمر نص الضرس لو حشيناه بلاتين دا هايتسبب فى كسر الضرس وساعتها بيبقى الحشو التجميلى أفضل
نتكلم عن حشو الليزر فى الصفحة الجاية
أنا باحاول أقلل حجم المقالات منعا للملل (ولا رأيكم إيه)
لقراءة مقال حشو الليزر إضغط هنا
لمراجعة المقدمة عن التسوس إضغط هنا
ولو عايز تسأل عن حاجة روح على الكومنتات
ولو عايز تشير الموضوع دوس على زرار الفيس بوك الموجود أسفل المقال مباشرة
تعليقات: 0
إرسال تعليق