حشو الليزر
Dental composite
والحشو دا له ألوان ودرجات وظل وحركات بحيث إنه قدر الإمكان ياخد شكل ولون وظل السنة اللى هاتتحشى بيه
يعنى هو مش لون ثابت , الدكتور بيبقى عنده كذا درجة وبيختار اللى يناسب أسنانك
ودا مش بيتخلط على حاجة علشان ينشف ولكن بتسليط نوع من الضوء عليه بينشف تماما , هو نوع من الضوء مش ليزر ولكن هانمشيها ليزر بدل مانعقد نفسنا بتفاصيل مالهاش لازمة .
هايمسك إزاى فى سطح السنة؟
أول خطوات الحشو بعد إزالة التسوس الدكتور بيحط مادة معينة على سطح السنة بتعمل فتحات صغيرة جدا ( لا ترى بالعين ) فى سطح السنة والفتحات دى بيدخل فيها اللاصق والحشو وبعد مابتسلط عليه الضوء وينشف بيلتصق بالسنة بشكل جيد
مميزاته
- لونه طبعاشكله الجمالى هو على قمة المميزات (تخيل لو حاشى بلاتين فى سنة أمامية هايبقى شكلها عامل ازاى)
- موضوع التسريب بين الحشوة والسنة قليل جدا جدا وأقل بكتير من البلاتين ودا طبعا بسبب طريقة التصاقه بالسنة لانه بيتخلل جوه السطح حرفيا
- طبعا مش هايتسبب فى كسر السنة لو الحشوة كبيرة بعكس البلاتين
عيوبه
- هو مش بقوة وصلابة البلاتين طبعا , ولكن التحديثات الجديدة والإضافات اللى فيها جديد بشكل دائم بتقلل نقاط ضعفه جدا- الشكل الجمالى ممكن يتغير مع الوقت لونه يغير أو يتصبغ أو يعمل خط بينه وبين الحشوة , ودا ممكن مايحصلش أو تكون فرصته قليلة مع الغسيل الدائم والمحافظة على نظافة الفم
- تكلفته أعلى من حشو البلاتين
هاتعمل بلاتين هاتعمل ليزر أيا يكن نوع الحشو فمعنى كدا إنك لحقت الضرس قبل مايوصل للعصب
ماسمعتش الكلام والسوسة وصلت العصب يبقى دخلت نفسك فى موال تانى وحشو عصب بقى وطربوش والذى منه ودى إن شاء الله
ليها قعدة تانية
تعليقات: 0
إرسال تعليق