أهم الأسئلة والإستفسارات حول حشو العصب
الأسئلة الشهيرة فى حشو العصب والشكاوى اللى بنسمعها
حشو العصب وقع
فيه ناس بتيجى العيادة تقول كنت عامل حشو عصب والحشو وقع
اللى تابع الحلقة اللى فاتت هايبقى عارف إن حشو العصب بيبقى جوا الجذر والحشو العادى فوقة , يبقى اللى وقع إيه؟
الحشو العادى هو اللى وقع أو اتكسر وبالتالى بنعيد الحشو الخارجى فقط مش هانعيد حشو العصب كله.
حشو العصب بالكمبيوتر
هى مش معلومة صحيحة ومافيش فعليا حشو عصب بالكمبيوتر
الموضوع كله إنى بدل ماباستخدم مبارد أو إبر كحت العصب بإيدى , فأنا باستخدم مبارد معينة ليها جهاز بيتركب فيها ودا بيعطى أداء أفضل وتحكم كويس فى التنظيف وبيساعد فى تقليل عدد الجلسات ممكن يبقى جلسة واحدة كمان بيتم فيها كل شئ.
وفيه جهاز كمان بيستخدم لقياس طول الجذر من جوه علشان يقلل نسبة الخطأ فى التنظيف
الجهازين دول مع بعض هم اللى بيقولوا عليهم حشو العصب بالكمبيوتر
الجهازين دول مع بعض هم اللى بيقولوا عليهم حشو العصب بالكمبيوتر
ولكن ممكن الدكتور يختارلك حشو العصب يدويا من غير استخدام التنظيف بالجهاز طبقا للحالة اللى هو شايفها , ساعتها مش هايبقى عمل لك الطريقة الأقل , يعنى إستخدام الجهاز من عدمه راجع لحالتك وطريقة العلاج اللى طبيبك هايعملها , يبقى لو طبيبك هايعمل لك حشو عصب يدوى مش هاتقول له لأ أنا عايز بالكمبيوتر مادمت بتثق فيه يبقى هو اللى يشوف المناسب لحالتك علشان يديك أفضل علاج.
حشو العصب بالليزر
مافيش حاجة خالص إسمها حشو العصب بالليزر
الحشو الخارجى اللى فوق حشو العصب يفضل يبقى حشو ليزر
يبقى لما أعمل حشو ليزر فى الضرس اللى حشيته عصب مايبقاش إسمه حشو عصب بالليزر
مافييييييش أى جديد فى حشو العصب باستخدام الليزر خااااالص
الدكتور حط كلور فى بقى
الكلور أو الكلوركس بيستخدم فى تنظيف قنوات العصب من زمان وحتى الآن فى كل دول العالم وكل الأبحاث الجديدة والتقنيات أثبتت إنه أفضل طريقة لتطهير قنوات العصب ومافيش أى بديل بنفس الكفاءة حتى الآن
إنسى بس إنك بتستخدمه فى غسيل الهدوم وفى الحمامات وهاتلاقى الموضوع عادى زيه زى أى مطهر
بنستخدم مطهرات غيره ولكن معاهم الكلوركس لازم ولا غنى عنه
فيه أسئلة تانية هانجاوب عنها فى الحلقة الجاية
ولو عند أى أسئلة إكتبها تحت فى التعليقات تحت المقال
وممكن تنشر الحلقة على الفيس بوك عن طريق زرار الفيس بوك اللى تحت
تعليقات: 0
إرسال تعليق